ក្រសួងយុត្តិធម៌ កំពុងរៀបចំនូវនីតិវិធី នៃការស្នើរសុំបន្ធូរបន្ថយ និង លើកលែងទោសដល់ ទណ្ឌិត ជាច្រើនរយនាក់ ក្នុងឪកាសពិធីបុណ្យជាតិសំខាន់ៗ

ភ្នំពេញ ៖ បើតាមការបញ្ជាក់ពីមន្រ្តីជាន់ខ្ពស់នៃក្រសួងយុត្តិធម៌បានអោយដឹងថា ក្នុងឪកាសនៃព្រះរាជពិធីបុណ្យអ៊ុទូក បណ្តែតប្រទីប សំពះព្រះខែ និង អកអំបុក ខាងមុខនេះ ទណ្ឌិតចំនួន ៥២៣នាក់ ក្នុងនោះ មានស្ត្រីចំនួន៣៧នាក់ នឹងត្រូវបានស្នើបន្ធូរបន្ថយ និង លើកលែងទោស។
លោក សុច សុផាន់ណារ៉ា អគ្គនាយករង នៃអគ្គនាយកដ្ឋាន កិច្ចការអយ្យការ និង ព្រហ្មទណ្ឌ បានមានប្រសាសន៍ថា ការទទូលយកសំណើរសុំការបន្ធូរបន្ថយទោស និងលើកលែងទោសនេះគឺធ្វើឡើងតាមការស្នើរសុំពីមណ្ឌលកែប្រែចំនួន ២៤ខេត្ត-រាជធានី និង មណ្ឌលកែប្រែ(ម៤)។
គួររំលឹកថា ជារៀងរាល់ឆ្នាំ ក្រសួងយុត្តិធម៌ តែងតែបានលើកសំណើរសុំបន្ធូរបន្ថយទោស និង លើកលែងទោសដល់ទណ្ឌិត នៅទូទាំងប្រទេស ក្នុងអំឡុងពេលនៃពិធីបុណ្យជាតិធំៗ ដូចជា ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ បុណ្យវិសាខបូជា និង បុណ្យចូលឆ្នាំថ្មីប្រពៃណីជាតិ ជាដើម ។

ដោយឡែកឆ្នាំនេះ បើតាម លោក សុច សុផាន់ណារ៉ា បានលើកឡើងថា គឺខុសពីឆ្នាំមុនៗ ដោយសម្ដេចតេជោ នាយករដ្ឋមន្រ្ដី នៃព្រះរាជណាចក្រកម្ពុជាបានស្នើអោយក្រសួងយុត្តិធម៌ ពិនិត្យមើលលើការបន្ធូរបន្ថយទោសបន្ថែមដល់ទណ្ឌិត ក្នុងឪកាសពិធីបុណ្យចំនួន ៣ទៀត ក្នុងនោះ មានបុណ្យឯករាជ្យជាតិ បុណ្យភ្ជុំបិណ្ឌ និងពិធីបុណ្យទិវា ឈ្នះ ឈ្នះ ដែលប្រព្រឹត្តទៅនៅថ្ងៃ ២៩ឆ្នូ ខាងមុននេះ ។
សូមជម្រាបថា ការលើកលែងទោសនេះ ក្រសួងយុត្តិធម៌ ឈរលើគោលការណ៍មនុស្សធម៌ក្នុងនោះ មានទណ្ឌិតចាស់ជរា អាយុចាប់ពី៦៣ឆ្នាំឡើងទៅ ស្រ្ដីមានផ្ទៃពោះ និង មានជំងឺធ្ងរធ្ងន់ជាដើម ៕