អ្នកគាំទ្ររំភើបរហូតស្រក់ទឹកភ្នែកក្រោយអឺរ៉ង់ឈ្នះម៉ារ៉ុកនៅ FIFA World Cup 2018

អ្នកគាំទ្រក្រុមបាល់ទាត់ជម្រើសជាតិអឺរ៉ង់បានអបអរយ៉ាងរីករាយ នៅក្រៅទីលាន Saint Petersburg ក្រោយក្រុមខ្លួនបានយកឈ្នះម៉ារ៉ុកនៅជំនួបបើកឆាកពូល B, FIFA World Cup 2018។

ជ័យជំនះនេះគឺត្រូវអរគុណដល់ ខ្សែប្រយុទ្ធ Aziz Bouhaddouz ដែលទម្លាយសំណាញ់ទីខ្លួនឯង នៅចុងម៉ោងនា ទី៩៥ ធ្វើអោយអឺរ៉ង់ឈ្នះម៉ារ៉ុកតែម្តង គឺ១-០។ នេះជាការឈ្នះទី២ របស់ពួកគេ នៅ World Cup ក្រោយឈ្នះលើកដំបូងនៅសហរដ្ឋអាមេរិក ឆ្នាំ១៩៩៨។ អ្នកគាំទ្រ មួយរូបឈ្មោះ Amir Ghorbani បញ្ចេញចំណាប់អារម្មណ៍ថា គេរីករាយឡើងហូរទឹកភ្នែកទៅហើយ ដែលអឺរ៉ង់បានឈ្នះ។

វាជាការប្រកួតដ៏អស្ចារ្យ ហើយកីឡាករពិតជាធ្វើបានល្អ។ សង្ឃឹមថាការប្រកួតជាបន្ត ក្រុមរបស់យើងនឹងនៅតែធ្វើបានល្អទៀត។ ជោគជ័យនេះ ធ្វើអោយអឺរ៉ង់ឡើងឈរកំពូលតារាងពូល B មាន៣ពិន្ទុ ខណៈម៉ារ៉ុកនៅបាតតារាង។ រីឯ ព័រទុយហ្កាល់និងអេស្ប៉ាញ នៅលេខ២ដូចគ្នា ក្រោយបានលទ្ធផលស្មើ ៣ទល់នឹង៣៕