Connect with us

កម្ពុជា-ថៃ​ ឯកភាពពង្រឹងនូវកិច្ចសហប្រតិបត្តិការងារត្រួតពិនិត្យគ្រឿងញៀន​ឆ្លងកាត់ព្រំដែន

ភ្នំពេញ​ ÷ ថ្ងៃទី៧​ ខែវិច្ឆិកា​ ឆ្នាំ២០១៨​ ឯកឧត្តម​ នាយឧត្តមសេនីយ៍​ កែ​ គឹមយ៉ាន​ ឧបនាយករដ្ឋមន្រ្តី​ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន​ បានទទួលជួបឯកឧត្តម​ ​ផាន់យ៉ារ៉ាក់​ ភូលថាប់ ឯកអគ្គរាជទូតថៃ​ ប្រចាំនៅព្រះរាជាណាចក្រកម្ពុជា​ ។

ក្នុងជំនួបនោះ ដើម្បីសំដៅធានាប្រសិទ្ធភាពលើការងារត្រួត​ពិនិត្យគ្រឿងញៀន​ ឯកឧត្តម​ នាយឧត្តមសេនីយ៍​ កែ​ គឹមយ៉ាន​ បានស្នើសុំ​ការជួយពីភាគីថៃ​ ជួយដល់កម្ពុជា ដូចជា​ ៖

  1. ជួយពង្រឹងយន្តការត្រួតពិនិត្យគ្រឿងញៀន​ ពង្រឹងសមត្ថភាពមន្រ្តីការិយាល័យទំនាក់ទំនងព្រំដែន​ BLO និងការអនុវត្តផែនការភូមិសគ្មានគ្រឿងញៀន​សំដៅទប់ស្កាត់ការចរាចរណ៍គ្រឿងញៀនឆ្លងកាត់ព្រំដែន​។ ចំពោះការអនុវត្តផែនការភូមិសគ្មានគ្រឿងញៀន​កម្ពុជា​ នឹងធ្វើជាសិក្ខាសាលាដកបទពិសោធន៍នៅខេត្តស្ទឹងត្រែង​។
  2. បន្តចូលរួមអនុវត្តគម្រោងសុវត្ថិភាពទន្លេមេគង្គ​។
  3. បន្តជួយលើការងារកសាងហេដ្ឋារចនាសម្ព័ន្ធមជ្ឈមណ្ឌលជាតិផ្តល់សេវាព្យាបាលដោយស្មគ្រ័ចិត្តនិងផ្អែកលើសហគមន៍នៅខេត្តព្រះសីហនុ​ ។
  4. បន្តជួយពង្រឹងសមត្ថភាពអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន​ ពង្រឹងសមត្ថភាពមន្រ្តីជំនាញ​ និងផ្តល់ឧបករណ៍ដល់មន្ទីរពិសោធន៍គ្រឿងញៀន។
  5. បន្តកម្មវិធីធ្វើទស្សនកិច្ចសិក្សាដកពិសោធន៍ការងារត្រួត​ពិនិត្យគ្រឿងញៀនដល់មន្រ្តីអនុវត្តច្បាប់កម្ពុជា​។
  6. ជួយគាំទ្រនិងការពារដល់ពលករកម្ពុជាដែលបាននិងកំពុងបំពេញការងារនៅប្រទេសថៃ។

ក្នុងឱកាសនោះដែរ​ ឯកឧត្តម​ នាយឧត្តមសេនីយ៍​ កែ​ គឹមយ៉ាន​ ក៏បានមានជម្រាបជូនពីលទ្ធផលកិច្ចសហប្រតិបត្តិការត្រួតពិនិត្យគ្រឿងញៀនកម្ពុជា-ថៃ​ នាពេលកន្លងមក​ ដូចជា៖

  1. ភាគីថៃបានជួុយបណ្តុះបណ្តាលមន្រ្តីជំនាញ​ និងជួយកសាងមជ្ឈមណ្ឌលព្យាបាល​លើថវិកាគាំទ្រជាង៥២លានបាត​ ពីឆ្នាំ២០១៤-២០១៨​ (នៅឆ្នាំ២០១៧​ បានជួយកសាងមជ្ឈមណ្ឌលព្យាបាល​នៅខេត្តព្រះសីហនុ​ លើថវិកាជាង៤០លានបាត)។
  2. ជួយពង្រឹងសមត្ថភាព​អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន​និង ផ្តល់សម្ភារបច្ចេកទេសដល់មន្ទីរពិសោធន៍​គ្រឿងញៀន​។
  3. ពង្រឹងដំណើរការការិយាល័យទំនាក់ទំនងព្រំដែន​ BLOក្នុងគោលដៅទប់ស្កាត់បទល្មើសគ្រឿងញៀនឆ្លងកាត់ព្រំដែន។

ជាមួយនឹងលទ្ធផលខាងលើ​ ឯកឧត្តម​ នាយឧត្តមសេនីយ៍​កែ​ គឹមយ៉ាន​ ក៏បានជម្រាបជូនភ្ញៀវពីសភាពការណ៍គ្រឿងញៀនទាំងក្នុងក្របខ័ណ្ឌ​ អនុតំបន់​ តំបន់​ ពិភពលោក​ និង​ នៅកម្ពុជា​ រួមនិងកិច្ចខិតខំប្រឹងប្រែងតស៊ូប្រយុទ្ធប្រឆាំងគ្រឿងញៀនរបស់សមត្ថកិច្ច​ ក្រោមការគាំទ្រពីអាជ្ញាធរជាតិប្រយុទ្ធប្រឆាំងគ្រឿងញៀន​។ យុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៣​ រយ:ពេល១១ខែចុងក្រោយនេះ​ ​សមត្ថកិច្ច​ បានធ្វើការបង្រ្កាបការជួញដូរ​គ្រឿងញៀន​ជាច្រើនករណី​ ដកហូតបាននូវវត្ថុតាងនិងមធ្យោបាយបម្រើដល់សកម្មភាពជួញដូរបានយ៉ាងច្រើនផងដែរ​ ។

ជាការកិច្ចឆ្លើយតប​ ឯកឧត្តម ​ផាន់យ៉ារ៉ាក់​ ភូលថាប់ អគ្គរាជទូតថៃ​ បានឯកភាពទាំងស្រុងលើសភាពការណ៍គ្រឿងញៀនដែលបានលើកឡើងដោយឯកឧត្តម​ ឧបនាយរដ្ឋមន្រ្តី​ កែ​ គឹមយ៉ាន​ និងទទួលយកនូវរាល់សំណូមពរសំដៅពង្រឹងកិច្ចសហប្រតិបត្តិការត្រួតពិនិត្យគ្រឿងញៀន៕

  • អត្ថបទទាក់ទង :
  • Featured
Loading...

ពេញនិយម