ការនាំចេញទំនិញពីកម្ពុជា ទៅទីផ្សារសហរដ្ឋអាមេរិក កំពុងមានកំណើនខ្លាំង

ភ្នំពេញ ៖ ការនាំចេញទំនិញពីកម្ពុជាទៅអាមេរិក ក្នុងរយៈពេល ៩ខែ ឆ្នាំ ២០១៨ នេះ មានអត្រាកំណើនរហូតដល់ ២៧ ភាគរយ ធៀបនឹងរយៈពេលដូចគ្នាកាលពីឆ្នាំ ២០១៧ នេះបើតាមទិន្នន័យពាណិជ្ជកម្មរបស់រដ្ឋាភិបាលអាមេរិក ដែលទើបធ្វើបច្ចុប្បន្នភាព ។
បើតាមការចុះផ្សាយទិន្នន័យពីការិយាល័យស្ថិតិរបស់ក្រសួងពាណិជ្ជកម្មអាមេរិក បានបង្ហាញថា កម្ពុជា បាននាំចេញទំនិញទៅអាមេរិកមានតម្លៃ ជាទឹកប្រាក់ចំនួន ២,៨៦ ពាន់លានដុល្លារ ក្នុង រយៈពេលពីខែមករា ដល់ខែ កញ្ញា ឆ្នាំ២០១៨ គឺកើនឡើង ២៧ ភាគរយ ។ ដោយឡែក អាមេរិក បាននាំចេញទំនិញ មានតម្លៃ ៣២២ លានដុល្លារ មកកម្ពុជា នៅក្នុងអំឡុងពេលដូចគ្នានេះ ដែល មានការកើនឡើង ១២ ភាគរយធៀបនឹងឆ្នាំ ២០១៧ ។

ផលិតផលសម្លៀកបំពាក់ និងស្បែកជើង ជាទំនិញដែលកម្ពុជា នាំចេញភាគច្រើនទៅទីផ្សារអាមេរិក ខណៈដែលទំនិញជាសម្ភារៈធ្វើដំណើរ ដូចជា វ៉ាលីស និងកាបូប ទទួលបានការអនុគ្រោះពន្ធ ទៅអាមេរិកកាលពីខែ កក្កដា ឆ្នាំ ២០១៦ ។
មានការព្យាករណ៍ទុកថា ការនាំចេញទំនិញពីកម្ពុជា ទៅទីផ្សារអាមេរិក នឹងនៅតែមានភាពវិជ្ជមាន ខណៈអាមេរិក បានសម្រេចចិត្តបង្កើនពន្ធនាំចូលលើទំនិញរបស់ប្រទេសចិន ដែលធ្វើឲ្យតម្លៃទំនិញរបស់ប្រទេសចិន ទៅទីផ្សារអាមេរិកកាន់តែខ្ពស់ ៕