ការនាំចេញអង្ករ នៅតែមានការធ្លាក់ចុះ បើធៀបនឹងរយៈពេលដូចគ្នាកាលពីឆ្នាំ២០១៧

ភ្នំពេញ ៖ របាយការណ៍ផ្លូវការណ៍ របស់លេខាធិការដ្ឋានច្រកចេញចូលតែមួយ សម្រាប់បំពេញបែបបទនាំចេញអង្ករ ដែលបានចេញនៅថ្ងៃទី១៣ ខែវិច្ឆិកានេះ បានបញ្ជាក់ថា នៅរយៈពេល១០ខែ (មករា ដល់ តុលា) ឆ្នាំ២០១៨ កម្ពុជាបាននាំចេញអង្ករ ៤៣៤,៨០៧តោន ធ្លាក់ចុះ១៣.២០ភាគរយ បើធៀបនឹងរយៈពេលដូចគ្នាឆ្នាំ២០១៧ ដែលមានចំនួន ៤៩២,១១៥តោន ។
ប្រទេសដែលនាំចូលអង្ករពីកម្ពុជាច្រើនជាងគេមាន៖

1. ប្រទេសចិន ចំនួនជាង១១ម៉ឺនតោន
2. ប្រទេសបារាំង ចំនួនជាង៦ម៉ឺនតោន
3. ប្រទេសម៉ាឡេស៊ី ចំនួនជាង៣ម៉ឺនតោន

គួររំលឹកថា នៅឆ្នាំ២០១៧ កម្ពុជាបាននាំចេញអង្ករទៅកាន់ទីផ្សារបរទេស បានជាង៦៣ម៉ឺនតោន ហើយប្រទេសដែលទិញអង្ករពីកម្ពុជាច្រើនជាងគេ គឺប្រទេសចិន ។ ប្រទេសចិន បានផ្តល់កូតានាំចេញអង្ករឲ្យកម្ពុជា ចំនួន៣០ម៉ឺនតោនក្នុងមួយឆ្នាំ។
កាលពីពេលថ្មីៗនេះ រដ្ឋមន្ត្រីក្រសួងពាណិជ្ជកម្មកម្ពុជា ឯកឧត្តម ប៉ាន សូរស័ក្តិ បានស្នើប្រទេសចិន បង្កើនការនាំចូលអង្ករ និង កសិផលពីកម្ពុជាថែមទៀត ដើម្បីពង្រីកទំហំពាណិជ្ជកម្មទ្វេភាគី ដោយសារតែចំនួនដែលប្រទេសចិន បានទិញពីកម្ពុជា នៅមិនទាន់គ្រប់តាមការសន្យា ។
ជាមួយគ្នានេះ ដោយសារតែមានការធ្លាក់ចុះ នូវការនាំចេញអង្ករ កម្ពុជា ក៏កំពុងសម្លឹងមើលទីផ្សារថ្មីៗបន្ថែមទៀត ក្នុងនោះ រួមមានទំាងទីផ្សារនៅតំបន់អាហ្រ្វិកផងដែរ ៕